khala-e-zehn ke gumbad mein gunjta hun main
khud apne ahd-e-guzishta ki ek sada hun main

samet lata hun moti tumhaari yaadon ke
jo khalwaton ke samundar mein dubta hun main

tumhein bhi mujh mein na shayad wo pahli baat mile
khud apne waste ab koi dusra hun main

jo de sako to khunuk sae do mohabbat ke
khayal-o-khwab ki duniya mein jal raha hun main

wo khud mujhi mein kahin kho gaya na ho 'azad'
jise khala-e-zamana mein dhundta hun main