khalq-e-khuda hai shah ki mukhbar lagi hui
khamoshiyon ki bhid hai ghar-ghar lagi hui

sang o sag o sada sabhi pichhe pade hue
ek daud si hai hum mein barabar lagi hui

sad ehtimam-e-girya bhi aaya na apne kaam
bujhti nahin hai aag si andar lagi hui

aao ki mutmain karen apne zamir ko
mohar-e-sukut tod den lab par lagi hui

lazim hai ehtiyat faqihan-e-sheher ko
har ek nazar hai ab sar-e-mimbar lagi hui

muddat ke baad aae to ruthi hui si thi
takhti hamare nam ki dar par lagi hui

udti rahi kuchh is tarah ruswaiyon ki khak
jaise 'shafiq' baat koi par lagi hui