khamosh nigahon se wo yalghaar ka hona
milta hai nafi mein kisi iqrar ka hona

mahfuz mere khwab ko batlata nahin hai
ek aks-e-taraddud mein nigah-dar ka hona

hairat mein nahin dalta ab shahr-e-guman ko
har roz lahu-rang mein akhbar ka hona

aasar-e-talluq ko jala deta hai aksar
gumnam kisi dard mein gham-khwar ka hona

raste ke takalluf se chalo baat karen kuchh
mumkin nahin har mod pe ghar-bar ka hona

lamhon ke ishaaron se ayan hone laga hai
galiyon mein mere yar ki aghyar ka hona

karta hai bahut yaad shab-o-roz mera dil
phulon ke nagar mein rah-e-pur-khar ka hona

aqlim-e-jafa-kesh mein tum dekhna 'jafar'
lazim hai pas-e-dar kisi diwar ka hona