khayal-e-hijr mein ab jo bhi saneha hoga
wahi to phir se naya ek silsila hoga

kise khabar thi ki is raushni ki chadar mein
hamara ishq mein phulon se rabta hoga

amir-e-shahr ko paigham mil bhi jae to
gharib-e-shahr ka koi na aasra hoga

nae ufuq se gurezan na ho mere hamdam
purani soch se ab ye na faisla hoga

khuda ka shukr duaen jo rang lai hain
likhungi lafz main jo bhi wo barmala hoga

sunenge log ye jab bhi meri kahani ko
hisar-e-zat ke qaidi ka majra hoga

ajib haal hai andar ki khalfashaari ka
kise khabar thi ki aisa ye hadisa hoga