khayalon mein tum ko basane laga hun
main khud se bahut dur jaane laga hun

khushi ek chahi to anjam ye hai
ki khushiyon se daman bachane laga hun

gae jab se tum dur nazron se meri
tumhein dil ke nazdik pane laga hun

kahin phir na dekhe wo nazar-e-karam se
sukun be-rukhi mein jo pane laga hun

tafakkur hai chehre pe phir baghban ke
ki phir se nasheman banane laga hun

nae gham nai aarzuen hain 'afsar'
nai ek ghazal gungunane laga hun