khazana lutf ka jaise nafas nafas mein tha
ajab surur ka aalam meri hawas mein tha

wahan bhi log ujalon pe naz karte the
har aaftab-e-jahan tirgi ke bas mein tha

phire bhi din to use pattharon ke panw mile
wo ek phul jo muddat se khar-o-khas mein tha

thakan nahin thi ye tha be-hisi ka sannata
ajib karb sa ek nala-e-jaras mein tha

sukut-e-qalb ka aakhir shikar ho hi gaya
wo ek shakhs jo ta-umr pesh-o-pas mein tha

sabhi ko tiliyan apni aziz thin 'asrar'
ki jo parind tha khud-sakhta qafas mein tha