khizan ke dosh pe rakhta hai wo bahaar ka rang
ajab hai us ki nigahon mein intizar ka rang

ajab hai rasm-e-wafa aur e'tibar ka rang
ki dil mein ban ke dhadakta hai us ke pyar ka rang

sukun-e-dil ka thikana kahin na mil paya
basa hua hai nigahon mein jo dayar ka rang

labon pe jhuta tabassum nami si aankhon mein
ayan hai chehre se us ke firaq-e-yar ka rang

amir-e-shahr ko hum be-kason se kya matlab
use to chahiye bas apne eqtidar ka rang

hamari qaum ko padhne do qisse mazi ke
khabar to hone do kya tha salib-o-dar ka rang

nahin tha shauq mujhe hijraton ka koi 'zafar'
dayar-e-ghair mein le aaya rozgar ka rang