khizan ki sham ko zakhm-e-bahaar kis ne kiya
har ek resha-e-gul rang-bar kis ne kiya

khushi visal ki sari samet li tu ne
firaq lamhon ko bolo shumar kis ne kiya

har ek shakhs yahan bad-guman tujh se tha
nigah-e-yar tera e'tibar kis ne kiya

ye mere ghar ki udasi gawahi degi tujhe
ki tere hijr ke dariya ko par kis ne kiya

mata-e-jaan ko kiya khak kis ne tere liye
ye khak-e-jaan hi bataegi pyar kis ne kiya

wafa mein jaan lutane ke baad bhi 'lubna'
mere khulus-e-mohabbat pe war kis ne kiya