khud apni aanch se ek shakhs jal gaya mujh mein
ye main nahin hun to phir kaun dhal gaya mujh mein

ye kis ne chhed ke rakh di meri ana ki sipar
ye kaun tir ki manind chal gaya mujh mein

phir us ki yaad mein dil be-qarar rahne laga
phir ek bar ye patthar pighal gaya mujh mein

ye aaine mein mere aks ke siwa kya tha
ki ek shakhs achanak dahal gaya mujh mein

kuchh aise habs bhare roz-o-shab mile mujh ko
ki ek pae ka fankar gal gaya mujh mein

kisi taraf se sahaara mila na jab koi
to ek dolta insan sambhal gaya mujh mein

dhanak ke rang bhala kaun chhu saka 'zamin'
ye aaj kyun mera bachpan machal gaya mujh mein