khud ke sae se bhi hairan nazar aata hai apne ghar mein bhi wo mehman nazar aata hai kis ka chehra hai jo be-sakhta hota hai ayan khwab bhi aankh mein hairan nazar aata hai us ne bhi koi khabar ghar ke ujadne ki na li jis ki chhat se mera dalan nazar aata hai aamad-e-yar mein tasir bahaaron si hai chehra chehra jo gulistan nazar aata hai kisi nadan ne phir zikr-e-wafa chheda hai yar mahfil mein pareshan nazar aata hai mil raha hai wo bahut pyar se ai dil mohtat ek nae dard ka unwan nazar aata hai main bhi masrur nahin us se kinara kar ke wo bhi us or pasheman nazar aata hai zindagi yaad dilati hai judai teri sans lene ka jo imkan nazar aata hai rukh badal leta hai be-sakhta rahbar mera jab bhi rasta koi aasan nazar aata hai hain yahan qaid kai yaad ke bekas panchhi apna kamra mujhe zindan nazar aata hai