khud ko bhuka hi rakha aur kamai roti
tab kahin bap ne bachchon ko khilai roti

us ki mehnat ke hi sadqe mein mili hai hum ko
us ne jal jal ke hi kheton mein ugai roti

ek muddat mein mere ganw ko lauta jab main
apne hathon se meri man ne khilai roti

aur mangega bhi kya is ke siwa budha faqir
ek kambal ho agar aur do dhai roti

hum ne khun de ke banaya hai zamin ko zarkhez
tab kahin ja ke tere hath mein aai roti

us ke chehre pe khushi dekhne ke laeq thi
us ne jab pahli dafa gol banai roti

main ne kal shab jo sabab rone ka puchha us se
us ne chanda mein ishaare se dikhai roti