khud ko pahron thakati hun main
yaad ke but banati hun main

dhyan hatta nahin hai mera
dhyan tujh se hatati hun main

kaun tere siwa hai mera
tujh ko apna banati hun main

jab mujhe yaad aata hai wo
do-jahan bhul jati hun main

khwab hai teri chahat mujhe
khwab khud ko dikhati hun main

jal raha hai diye se diya
bantti hun to pati hun main

aaj nau sal pure hue
apni wahshat manati hun main

wah wa ki zarurat nahin
zakhm likh kar dikhati hun main