khud ko sharminda-e-dua na kare
hai bashar wo jo iltija na kare

kash wo dil mein ho mere paiwast
un ka tir-e-nazar khata na kare

ho ke majbur hai bashar mein ye shar
gar mile ikhtiyar kya na kare

lutf aa jae dil jo koi kaam
aap ki yaad ke siwa na kare

dil mein jab tak na ho koi tahrik
sher shair kabhi kaha na kare

yaad-e-haq kya karoge piri mein
kya khabar umr hi wafa na kare

jo mohabbat mein jaan de na sake
wo mohabbat ka hausla na kare

hai khuda khush usi se ai 'aqil'
jo kisi ka kabhi bura na kare