jin ko har rang mein jine ka kamal aata hai
un ke aaina-e-dil mein kahin baal aata hai

kaun sunta hai sada tute dilon ki ai dil
gham-nasibon ka bhala kis ko khayal aata hai

yun to mansur bane phirte hain kuchh log magar
un ke hosh udte hain jab sar ka sawal aata hai

hum ki aazad hain khush-bash parindon ki tarah
kuchh bhi hota rahe kab dil mein malal aata hai

dil mein jal uthti hain sau shamen hasin yaadon ki
jab hamein ahd-e-jawani ka khayal aata hai

kyon unhen khabt mohabbat ka hai jin ke aage
jine marne ka mohabbat mein sawal aata hai

jis ke muhtaj shahanshah bhi hain ai 'aqil'
hum faqiron ko ek aisa bhi kamal aata hai