khud ko tere mear se ghat kar nahin dekha
jo chhod gaya us ko palat kar nahin dekha

meri tarah tu ne shab-e-hijran nahin kati
meri tarah is tegh pe kat kar nahin dekha

tu dashna-e-nafrat hi ko lahraata raha hai
tu ne kabhi dushman se lipat kar nahin dekha

the kucha-e-jaanan se pare bhi kai manzar
dil ne kabhi is rah se hat kar nahin dekha

ab yaad nahin mujh ko 'faraaz' apna bhi paikar
jis roz se bikhra hun simat kar nahin dekha