khud koi chaak-gareban hai rag-e-jaan ke qarib
ai junun hashr ka saman hai rag-e-jaan ke qarib

manzil-e-dil se to guzre hue din bit gae
karwan-e-gham-e-jaanan hai rag-e-jaan ke qarib

dar-ba-dar kis liye aawara ho sar-gashta ho
dosto kucha-e-jaanan hai rag-e-jaan ke qarib

kya kahen ab dil-e-betab ka aalam yaro
muztarib jaise rag-e-jaan hai rag-e-jaan ke qarib

kyun na kanton ki taraf jaen tere diwane
khalish-e-jumbish-e-mizhgan hai rag-e-jaan ke qarib

shabnam-e-ashk gira deta hai zakhm-e-jaan par
koi hamdard sa insan hai rag-e-jaan ke qarib

kis ke gae hue naghmat sunata hun 'shamim'
kaun hai wo jo ghazal-khwan hai rag-e-jaan ke qarib