khud se juda hue to kahin ke nahin rahe
yun dar-ba-dar hue ki zamin ke nahin rahe

rishte rafaqaton ke raqabat mein dhal gae
diwar-o-dar bhi apne makin ke nahin rahe

hijrat-zada libas mein phirte hain dar-ba-dar
rahna tha jis nagar mein wahin ke nahin rahe

ye kuza-gar ye chaak ye mitti ye aag sab
zoam-e-hunar mein dekh kahin ke nahin rahe

khwabon ke zakhm aankh se risne lage 'ghazal'
ye dard-e-jaan bhi qalb-e-hazin ke nahin rahe