khulus-e-rind se mat intiqam le saqi
sharab-e-gham jo nahin hai to jam le saqi

nahin jahan mein koi aur gham ke maron ka
ye mai-kada hai mohabbat se kaam le saqi

nigah-e-lutf se us ko nawazta hai tujhe
jo mai-kade mein taqaddus ka nam le saqi

shikast-e-jam ka sunte hain waqt aa pahuncha
ab apne hath se dil apna tham le saqi

agar tujhe nahin manzur ehtiram apna
chala wo apne 'wasi' ka salam le saqi