khunuk-joshi na karte jun saba gar ye butan hum se
to misl-e-ghuncha-e-gul dil na jata raegan hum se

phire us zulf-o-ru ke ishq mein donon-jahan hum se
udhar kuffar phir gae sab idhar imaniyan hum se

adu the mali aur sayyaad gulchin ne qayamat ki
khuda lanat kare tinon pe chhuta gulistan hum se

ujada girya-e-shor-e-junun ke waste hum ko
wale gulshan ko aur aab-o-namak tha baghban hum se

hamein to rasti jon tir hargiz ras aai nin
hamesha tedhe hi rahte hain ye abru-kaman hum se

aqab yaron ke sar par khak karte hum bhi jate hain
raha jata nahin jon gard-e-rah-e-karwan hum se

hamein tiflan to pattharon ki mohabbat se na bhulenge
chale sahra ko hum phir gae bala se shahriyan hum se

hamin tuk zabh kar le saya-e-gulbun mein jita rah
chhudaya tu ne gar sayyaad gul ka aastan hum se

maze mein dard-e-sar ke kab se mohtaj-e-dawa 'uzlat'
abas ai sandali-rango hue ho sargiran hum se