khush-fahmiyon ke khel ki ab kya sabil hai
kaghaz ki ek naw hai aur khushk jhil hai

sar par uthae dhup ko suraj ki tarah chal
manzil kahan ye silsila-e-sang-mil hai

lashon ke dher mein abhi zinda to hun magar
mere bhi sar pe udti hui ek chil hai

saya bhi band mutthi mein rakhta hai bhinch kar
uncha sa ye darakht nihayat bakhil hai

main ghaw gahre paniyon ka hun na mujh se mil
tu mujh mein dub jaegi nannhi si jhil hai

darwaze khidki mujh pe 'musawwir' hain sab hi band
sarma ka thithura chand hai aur shab tawil hai