khush-qadan jab sawar hote hain
sarw-o-qumri shikar hote hain

tere baalon ke wasf mein mere
sher sab pechdar hote hain

aao yaad butan pe bhul na jao
ye taghaful-shiar hote hain

dekh lewenge ghair ko tujh pas
sohbaton mein bhi yar hote hain

sadqe ho lewen ek-dam tere
phir to tujh par nisar hote hain

tu kare hai qarar milne ka
hum abhi be-qarar hote hain

haf-iqlim har gali hai kahin
dilli se bhi dayar hote hain

rafta rafta ye tifl-e-khush-zahir
fitna-e-rozgar hote hain

us ke nazdik kuchh nahin izzat
'mir'-ji yun hi khar hote hain