khwab apne meri aankhon ke hawale kar ke
tu kahan hai mujhe nindon ke hawale kar ke

mera aangan to ba-juz tere mahakta hi nahin!
barha dekha hai phulon ke hawale kar ke

ek gumnam jazire mein utar jaunga
apni kashti kabhi lahron ke hawale kar ke

kaisa suraj tha ki phir laut ke aaya hi nahin
chand tare meri raaton ke hawale kar ke

mujh ko malum tha ek roz chala jaega!
wo meri umr ko yaadon ke hawale kar ke

ghar ki virani badal dali hai raunaq mein 'hasan'
sahn ka ped parindon ke hawale kar ke