khwab-gar khwab banata hi chala jata hai
jis ko jo aae samajh us ko utha lata hai

raat bujhti hai to jag uthte hain wahshi manzar
din ujadta hai to dil khauf pe uksata hai

tu ne jalte hue manzar ko hawa kyun di thi
rakh ab udne lagi hai tu kidhar jata hai

ye tere soche hue rang ka muhtaj nahin
husn to husn hai har rang mein itraata hai

dekhne wale mohabbat ki nazar se dekhen
main wo manzar hun jise husn-e-nazar bhata hai

ai moallim ki tarah ishq padhane wale
ishq lecture se nahin kar ke samajh aata hai

ek mushtaq-nigahi ki talab mein 'shahid'
jis ko dekho wahi taswir hua jata hai