khwab jo dekhe hain main ne unhen paikar dega
mera sahra mujhe ek roz samundar dega

ek qatra jo larazta hai meri palkon par
zard mausam ko yahi qatra hara kar dega

mujh ko kuchh aur fazaon mein bikhar jaane do
mera ehsas khalaon mein mujhe ghar dega

hun gunahgar magar itna gunahgar nahin
mujh ko dega bhi to wo phul sa patthar dega

sochta hun to thakan aur bhi badh jati hai
phir mujhe izn-e-safar harf-e-mukarrar dega

isi aalam mein mere khwabon ki duniya bhi hai
meri duniya ko bhi waqt ek payambar dega

mere hamraaz mere dost mere sath na chal
lamha lamha tujhe aawaz ki thokar dega