khwab sharminda-e-tabir nahin ho sakta
dil mukammal kabhi taskhir nahin ho sakta

aaj ruthe hue sajan ne bulaya hai mujhe
aaj to kuchh bhi inan-gir nahin ho sakta

ho na ho ye koi apna hi khula hai mujh par
mere dushman ka to ye tir nahin ho sakta

bandh le dost girah mein ye mera farmaya
kuchh bhi kar le tu magar 'mir' nahin ho sakta

karbala ke liye makhsus hai bas ek hi shakhs
dusra koi bhi 'shabbir' nahin ho sakta