khwabon ki anjuman mein na viraniyon mein tha
dil ka surur shauq ki nadaniyon mein tha

tahzib-e-nau shuur ka aaina ban gai
lekin wo imbisat jo nadaniyon mein tha

honthon pe pyas chehron pe hirman ki gard thi
kya ehtimam be-sar-o-samaniyon mein tha

nafrat ki aag zehn ka aaseb ban gai
shoalon ka raqs ab ke huda-khwaniyon mein tha

chehre 'qamar' chale gae jismon se ruth kar
main aaina liye hue hairaniyon mein tha