kis ki tahwil mein the kis ke hawale hue log
chashm-e-girya mein rahe dil se nikale hue log

kab se rahon mein teri gard bane baithe hain
tujh se milne ke liye waqt ko tale hue log

kahin aankhon se chhalakne nahin dete tujh ko
kaise phirte hain tere khwab sambhaale hue log

daman-e-subh mein girte hue taron ki tarah
jal rahe hain teri qurbat ke ujale hue log

ya tujhe rakhte hain ya phir teri khwahish dil mein
aise duniya mein kahan chahne wale hue log