kis ne dekhi hai bahaaron mein khizan mere siwa
kaun kar sakta hai ye qissa bayan mere siwa

kis ko malum hai sahra ki hawaon ka mizaj
ret par kaun banaega makan mere siwa

sab faqiran-e-shab-e-hijr watan chhod gae
kaun ab dega bayaban mein azan mere siwa

thapkiyan kaun sar-e-dasht mujhe deta hai
kya koi aur bhi rahta hai yahan mere siwa

ek ek zakhm mere ashk se ye kahte rahe
ab koi aur na ho naqsh-ayan mere siwa

is nae shahr ki is bhid mein ai hazrat-e-ishq
jaanta kaun hai ab tum ko miyan mere siwa