kis ne khinchi manzaron par bad-hawasi ki lakir
har taraf chhane lagi gahri udasi ki lakir

apne apne kase sab ahbab le kar ja chuke
kaun padhta hai labon se ek pyasi ki lakir

in dinon rahm-o-karam hai mausam-e-baran ka kya
phailti hi ja rahi hai bad-qayasi ki lakir

apni qismat mein safar ka aab-o-dana sath hai
ghar se le kar hum chale rakht-e-asasi ki lakir

ahd-e-nau ke safha-e-qirtas par qurban ab
ug gai har samt ek shakhs-e-siyasi ki lakir