kis qadar kam-asas hain kuchh log
sirf apna qayas hain kuchh log

jin ko diwar-o-dar bhi dhak na sake
is qadar be-libas hain kuchh log

mutmain hain bahut hi duniya se
phir bhi kitne udas hain kuchh log

wo bure hon bhale hon jaise hon
kuchh hon logon ko ras hain kuchh log

mausamon ka koi asar hi nahin
in pe jangal ki ghas hain kuchh log

tirgi mein nazar nahin aate
sae ki tarah pas hain kuchh log