kis rang mein hain ahl-e-wafa us se na kahna
kyun phul hain khushbu se juda us se na kahna

dubi nahin muddat se jo nazron ke bhanwar mein
is aankh ka jo haal hua us se na kahna

yaadon ke dar-o-baam pe ek nam wahi nam
kya jaane kai bar likha us se na kahna

lipti thi darichon se hasin chandni kaise
kya kya mujhe taron ne kaha us se na kahna

bujhti hi nahin pyas yahan jalte labon ki
bin barse guzarti hai ghata us se na kahna

bikhri thin kabhi rangaten us sune nagar mein
ab 'sham' na khushbu na hawa us se na kahna