kis tarah man len tujhe haq par
log chalte hain apne maslak par

ashk jamte hain din ki garmi mein
dil pighalta hai shab ki thandak par

nind bistar pe aa ke baithi hai
aur hai mera dhyan dastak par

dakhl hota kahan hai mazhab ka
ishq chalta kahan hai maslak par

qimaton ke ghurur mein aa ke
hans rahi hai dukan gahak par

wo thi shauqin rail dekhne ki
main bhi jata tha roz phatak par

chat jati hai ruh ko 'ariz'
daliye zahr man ki dimak par