kis tarah ye dil hua tum par fida likh jaunga
apni peshani pe apni har khata likh jaunga

nek-nami aap ki qaem rahegi is tarah
aap ko masum main khud ko bura likh jaunga

lauh par mujh se khuda likhwae gar meri raza
wo hamesha khush rahen main ye dua likh jaunga

tajraba jis se mere dil ne bahut paya surur
dekhna un ki haya ki intiha likh jaunga

main wasiyyat mein lahad apni sajaane ke liye
ho kafan mera faqat un ki rida likh jaunga