kise bataun ki gham kya hai sarkhushi kya hai
abhi zamane ka mear-e-agahi kya hai

qadam qadam pe main sambhla hun thokaren kha kar
ye thokaron ne bataya ghalat-rawi kya hai

zamin pe lala-o-gul aasman pe mah o nujum
nigah-e-hsun-e-nigah ke liye kami kya hai

kamand dal raha hai jo chand taron par
khuda hi jaane ki taqdir-e-admi kya hai

nafs ki aamad-o-shud par bhi ikhtiyar nahin
ye zindagi hai to maqsud-e-zindagi kya hai

wafa-paraston se kyun zid hai us pe sab chup hain
sawal ye hai ki is ka jawab hi kya hai

'uruj' tirgi-e-shab ka ehtiram karo
isi se tum ne ye jaana ki tirgi kya hai