kise pukare madad ko kise bulae badan
akele ishq ko kaise sanbhaal pae badan

main apni ruh se milwa dun us ko khush ho kar
wo darmiyan se apne agar hatae badan

na jaane phunk diya kya shikari ne padh kar
chhuri ke niche parindon ne khud bichhae badan

kabhi jo dekho to bazar-e-husn mein ja kar
yahan wahan rakhe honge saje sajae badan

andhere khauf ke tabdil hon ujalon mein
hamari qabr mein ai kash tera aae badan

are shuur nahin hai use to itna bhi
chhupae bhi to wo kis tarah se chhupae badan

ye ji mein aata hai ab to utar kar rakh den
kahan kahan phiren aakhir 'shikha' uthae badan