kisi be-kas ke kase mein jo tu maqdur ho jae
gada ho kar wo rashk-e-qaisar-o-maghfur ho jae

mohabbat chahiye dil mein mohabbat hai to sab kuchh hai
ye hai to dil ki tariki sarapa nur ho jae

mohabbat khel hai ulta ise chaho ye khinchti hai
koi aae qarib is ke to ye khud dur ho jae

zamane ke hawadis se dil-e-ashiq to patthar hai
mohabbat mein jo ye tute to chakna-chur ho jae

jo main masrur hota hun tujhe maghmum pata hun
jo main maghmum ho jaun to tu masrur ho jae