kisi bhi khanaman-barbaad se nahin hoga
hamara ishq to farhad se nahin hoga

tumhaari dad ya be-dad se nahin hoga
hamara sher hai imdad se nahin hoga

ye lafziyat ye bandish ye fikr farsai
ye kaam wo hai jo naqqad se nahin hoga

yun khinchta hun ghazal mein tere badan ke khutut
ye jaan-e-man kisi bahzad se nahin hoga

agar hua bhi rihai ka gar koi imkan
huzur minnat-o-fariyaad se nahin hoga