kisi bhi samt niklun mera pichha roz hota hai
taaqub mein koi gumnam saya roz hota hai

kisi ek mod par har roz mujh ko mil hi jati hai
taaruf zindagi se ghaebana roz hota hai

main ek anjaan manzil ke safar par jab nikalta hun
tasawwur mein koi manus chehra roz hota hai

yahi tanhaiyan hain jo mujhe tujh se milati hain
inhin khamoshiyon se tera charcha roz hota hai

ye ek ehsas hai aisa kisi se kah nahin sakta
teri maujudgi ka ghar mein dhoka roz hota hai

shajar bechaargi se dekhta hai is tamasha ko
juda shakhon se us ki koi patta roz hota hai

main apne-ap par bhi khud ko zahir kar nahin sakta
mere ehsas par ek sakht pahra roz hota hai

ye manzar dekh kar hairan rah jati hain maujen bhi
yahan sahil pe ek tuta gharaunda roz hota hai

bahut din se in aankhon ko yahi samjha raha hun main
ye duniya hai yahan to ek tamasha roz hota hai

main ek kirdar ki surat kai parton mein jita hun
meri be-chehragi ka ek chehra roz hota hai