kisi dar pe jaane ko ji chahta hai
wafa aazmane ko ji chahta hai

uthaya tha jis bazm se hum ko ek din
wahin phir bhi jaane ko ji chahta hai

hue mundamil zakhm-e-dil mere lekin
nae zakhm khane ko ji chahta hai

maal-e-mohabbat samajhta hun phir bhi
kahin dil lagane ko ji chahta hai

hain kaise maze ke tere jhute wade
ki phir dhoka khane ko ji chahta hai

wo phir aaj kuchh hum se ruthe hue hain
unhen phir manane ko ji chahta hai

hai muddat se suni mere dil ki mahfil
tumhin se sajaane ko ji chahta hai

jo raushan hain mahfil mein aql-o-khirad se
wo shamen bujhane ko ji chahta hai

jo soe hue dil mein halchal macha de
wo tufan uthane ko ji chahta hai

'habib' aag bhar den jo sine mein sab ke
wo naghme sunane ko ji chahta hai