kisi ki aankhon mein sail-e-ab nahin
zindagi tera bhi jawab nahin

hum se kahti hai sham-e-tanhai
main nahin aaj ya janab nahin

dil ko zanjir kar diya hum ne
ab wo pahla sa pech-o-tab nahin

munh se kuchh bol waqt thoda hai
khamushi baat ka jawab nahin

jis se raushan hai dasht-e-fikr-o-khayal
ek aurat hai mahtab nahin

sath hai zindagi ke ranj-e-firaq
ek do din ka ye azab nahin

apni tabir apne pas rakho
meri aankhon mein koi khwab nahin

rahm kar rahm rabb-e-maujudat
bakhshishon ka teri hisab nahin