kisi ki khatir ho phul sawan
mere liye to babul sawan

na jaane kab tha ye pani pani
hai is baras dhul dhul sawan

barahna pedon se jate jate
khiraj kar le wasul sawan

tu barah barson ke baad aata
dua jo hoti qubul sawan

zarur aayega koi kal tak
de khud ko thoda sa tul sawan

use to phansi pe jhulna hai
tu apne jhule pe jhul sawan

'niyazi' dil ho ki ped sab ko
gaya hai kar ke malul sawan