kisi ki nabz pe is tarah ungliyan rakh de
ki tere samne wo dil ki dastan rakh de

main zakhm zakhm badan ko chhupaun kis kis se
khuda ke waste tu hath se kaman rakh de

tu ek bar mujhe dharne de zamin pe qadam
phir us ke ba'd mere sar pe aasman rakh de

jo dekhna hai meri ruh ki tawanai
to mere jism ko shoalon ke darmiyan rakh de

utha sake na agar koi bhi zamir ka bojh
mere hi dosh pe ye bar-e-do-jahan rakh de

khuda ki den ki kya baat hai jo wo chahe
dahan-e-sang mein bhi phul ki zaban rakh de