kisi ko fikr jo di hai to fan nahin deta
wo sab ko ek sa tarz-e-sukhan nahin deta

main apni khana-nashini mein har tarah khush hun
na de koi jo mujhe anjuman nahin deta

use khabar hai ki tarz-e-khitab jaanta hun
isi liye mujhe izn-e-sukhan nahin deta

bade nasib se milti hai aisi jama-dari
khuda har ek ko diwana-pan nahin deta

bujhao tum bhi ise phunk mar ke 'qaisar'
koi charagh ki lau mein dahan nahin deta