kisi ko naz-e-khirad hai kisi ko fakhr-e-junun
main apne dil ka fasana kahun to kis se kahun

na iztirab mein lazzat na aarzu-e-sukun
koi kahe ki main ab kya fareb kha ke jiyun

rahegi phir na ye kaifiyyat-e-talab ai dil
chhupe hue hain to hai ishtiyaq-e-did fuzun

hai aaj dil pe guman husn-e-na-shanasi ka
jala chuke jab use jalwa-ha-e-guna-gun

ho ab bhi fikr mein mushkil to yaad aate hain
wo har ada mein taghazzul ke saikdon mazmun

tum aise kaun khuda ho ki umr bhar tum se
umid bhi na rakhun na-umid bhi na rahun