kisi ne bhi use dekha nahin hai
wo ek ehsas hai chehra nahin hai

meri jo sans aa kar ja rahi hai
to kya ye jaan ka jaana nahin hai

ajab shahr-e-ana mein ji raha hun
kisi ke pas aaina nahin hai

mujhe jo log rasta de rahe hain
unhen khud rasta milta nahin hai

akela sa jo hai ek shakhs bahar
wo mujh mein hai magar tanha nahin hai

mohabbat hai 'shahab' ek ism-e-azam
dar-e-dil khud hi wa hota nahin hai