kisi wahshat mein phir aabaad hona chahta hun
main us ki qaid se aazad hona chahta hun

purani shakl surat gar malamat ban gai hai
nai mitti se phir ijad hona chahta hun

kisi ke hijr mein hairat-kade aabaad dekhun
kisi ke wasl mein barbaad hona chahta hun

use bhi apni banhon mein tadapta dekhna hai
main us ka said tha sayyaad hona chahta hun

usi khushbu se phir ham-khwab hone ki hawas hai
usi khush-wasl se dil-shad hona chahta hun

ab apni zat ke zindan mein bhi dam ghut raha hai
koi dam khud se bhi aazad hona chahta hun