kitab-e-ishq mein sara bayan visal ka hai
main zinda hijr mein hun aur guman visal ka hai

hum aise farq-e-talluq se khud bhi hairan hain
zamin hai hijr ki aur aasman visal ka hai

ajab tazad ke pesh-e-nazar hun hasti mein
hai dhup hijr ki aur saeban visal ka hai

hai jagne pe hi padta tamam chabuk-e-hijr
hon aankhen band to sara saman visal ka hai

chalo ye hijr sahi kuchh to dastaras mein rahe
jo waqt aata hai wo bhi kahan visal ka hai

gharaz se chup hain magar ahl-e-dil samajhte hain
ki lafz-e-hijr se raushan-bayan visal ka hai

kashid karte hain irfan apne hijr se 'tur'
ye khitta chhod ke sara jahan visal ka hai