kitne arman chashm-e-tar se bah gae
pyar ke moti bikhar kar rah gae

ashk palkon pe larazte rah gae
ek afsana alam ka kah gae

tum to bante the sharik-e-zindagi
do qadam hi sath chal kar rah gae

un ka gham dil mein chhupana hi pada
dil pe jo guzri wo hans kar sah gae

kaun jaane manzilon ki khoj mein
qafile kitne bhatak kar rah gae

dil kisi ka todne se pahle soch
kitne moti chashm-e-tar se bah gae

kar rahe the hasraton ka tazkira
log samjhe sher 'zahid' kah gae