kitni bulandiyon pe sar-e-dar aae hain
kisi marka mein ahl-e-junun haar aae hain

ghabra uthe hain zulmat-e-shab se to bar-ha
nale hamare lab pe sharar-bar aae hain

ai qissa-go azal se jo biti hai wo suna
kuchh log tere fan ke parastar aae hain

pai gulon se aabla-pai ki jab na dad
diwane hain ki su-e-lab-e-khar aae hain

gham-khwariyon ki tah mein dabi si masarraten
yun mere pas bhi mere gham-khwar aae hain

pahunche hain jab bhi khalwat-e-dil mein to ai nadim
aksar hum apne aap se be-zar aae hain

us bazm mein to mai ka kahin zikr tak na tha
aur hum wahan se be-khud o sarshaar aae hain

us ki gali mein hum ne luta di mata-e-jaan
us ki gali se hum to subuksar aae hain

karte rahe hain fan ki parastish tamam umr
mahshar mein kaise kaise gunahgar aae hain

'jazbi' jo ho sake to meri hairaton se puchh
kis tarah mere zehn mein ashaar aae hain