kiye aarzu se paiman jo maal tak na pahunche
shab-o-roz-e-ashnai mah o sal tak na pahunche

wo nazar baham na pahunchi ki muhit-e-husn karte
teri did ke wasile khad-o-khal tak na pahunche

wahi chashma-e-baqa tha jise sab sarab samjhe
wahi khwab mo'tabar the jo khayal tak na pahunche

tera lutf wajh-e-taskin na qarar sharh-e-gham se
ki hain dil mein wo gile bhi jo malal tak na pahunche

koi yar jaan se guzra koi hosh se na guzra
ye nadim-e-yak-do-saghar mere haal tak na pahunche

chalo 'faiz' dil jalaen karen phir se arz-e-jaanan
wo sukhan jo lab tak aae pe sawal tak na pahunche